Wobkrućić abo wopodstatnić?

Eksistuje rozdźěl mjez słowjesomaj wobkrućić a wopodstatnić? Haj wón tu je, ale mam zaćišć, zo mnozy jón wjace njeznaja a tuž šěri so wopodstatnić na kóšty wobkrućić. Wopodstatnić (němsce „begründen“) móžemy na přikład někajke twjerdźenje abo někajki rozsud z argumentami abo přičinami. Wučerka twjerdźi, zo šulerjo přepozdźe spać chodźa a wopodstatnja to z tym, zo zdadźa so rano jara njewuspani. Měšćanosta wopodstatni swój rozsud z pobrachowacymi srědkami. Móžemy někajke tukanje abo někajki podhlad za přez wěste fakty wopodstatnjeny měć abo za njewopodstatnjeny. Wobkrućić je něšto druhe, němsce wotpowěduje tomu „bestätigen“, „bekräftigen“, „verbürgen“, „bescheinigen“a podobne. „Wy a waša žona staj sprawnaj, dušnaj čłowjekaj – to móžu wšudźe a přeco wobkrućić! Mam wot lěkarja wobkrućenje, zo njemóžu rjejenje znjesć, sym tak nerwozna.“ (Jurij Brězan)

Potajkim: Hdyž někajki podhlad abo rozsud wobkruću abo wobkrućam, potom jón jenož wospjet wuprajam. Lěpje wšak je, hdyž móžu jón tež wopodstatnić, hdyž móžu potajkim přičiny abo argumenty za njón mjenować: Ameriski prezident Bush zaso a zaso wobkruća podhlad, zo wobsedźi Irak masowe zaničowanske brónje. Wjetšina čłonskich statow UNO wšak žada sej za to wopodstatnjenje přez skupinu brónjowych kontrolerow.

S. Wölkowa

Themen: Sinnverwandte und ähnliche Wörter

Schlüsselwörter: Verb

Wörter: wobkrućić, wopodstatnić, bestätigen, bekräftigen, verbürgen, bescheinigen, begründen