Tři
Mojej synaj Julius a Jank słuchataj rady na spěwčki z CD-je „Kikerahi – biło je tři“ – to wobaj hižo rano w awće wótře spěwataj. Ryma dla wužiwa so w znatym spěwje porik kikerahi – tři, ale hewak ma wězo rěkać: Biła je třeća hodźina, je třoch, někotre mjeńšiny do abo po třoch. Hižo Anton Nawka radźi: „Tuž hladaj so paslow, kotrež ći staja numeral tři“ a dale zwěsći: „Tu knježi chětro wulka šmjatańca, a na tym je tónle numeral sam wina.“
Někotre přikłady: Z třomi holcami sej něchtó hrajka, snano tež z třomi hólcami, móžno tež, zo so kubłarki z dźěćimi wuchodźuja, snano samo po třoch, štož rěka po třećej hodźinje abo po třoch – tři dźěći porno sebi. Nadźijomnje pak nimaja trojaki zaměr, a tež trójka w šuli njeje najlěpša znamka. Haj, to je woprawdźe šmjatańca z tej trójku, respektiwnje z ličbu tři!
J. Šołćina
Themen: Grammatik
Schlüsselwörter: Numeral, Ableitung, Deklination