Stapel

W serbšćinje wužiwamy němsku požčonku stapl a wotwodźenki kaž tež werb staplować. W serbskich słownikach su pak tohorunja dalše wotpowědniki za němske stapl zapisane, mjenujcy hromada, sep, skład a retomas. Wužiwanje jednoho z tutych serbskich słowow wotwisuje wot konkretneho konteksta. W němskim słowje „Stapel“ tči pak woznamowa nuansa, kotraž so w serbskich wotpowědnikach prawje njejewi. Stapl je mjenujcy hromada ze samsnych wěcow, při kotrejž so jedna wěc na druhu kładźe. Přiwšěm praji so serbsce radšo hromada knihow abo hromada drjewa hač stapl knihow abo stapl drjewa. Hinak pak je to, hdyž dźe wo činitosć. Tu začuwamy tola trěbnosć, wotpowědnu woznamowu nuansu na kompaktne wašnje zwuraznić a tohodla rěčimy wo staplowanju piwowych kašćikow a mojedla tež wo staplowanju knihow abo staplowanju drjewa. Tež we wobłuku informatiki so radšo požčonka wužiwa, na přikład staplowe předźěłanje za ně. „Stapelverarbeitung“ abo staplowy składowak za ně. „Stapelspeicher“. Je potajkim druhdy zmysłapołne sej z druheje rěče słowa požčić, dokelž so z tym wurazowe móžnosće w serbšćinje rozšěrjeja a polěpšuja.

A. Pohončowa

Themen: Sorbische Entsprechungen für deutsche Wörter, Sinnverwandte und ähnliche Wörter

Schlüsselwörter: Substantiv, Verb, Lehnwort

Wörter: Stapel, stapl, staplowac, stapeln, hromada, sep, skład, retomas, staplowanje, staplowy, Stapelspeicher, Stapelverarbeitung