Schneiden
Krać – třihać – rězać – tři słowa z podobnym woznamom w serbšćinje. Wšěm třom móže w němčinje wotpowědować wuraz „schneiden“. Chlěb krać – „Brot schneiden“; włosy třihać – „Haare schneiden“, hałžki rězać – „Zweige schneiden“. Wšě tři pomjenuja dźělenje někajkeho předmjeta abo materiala z pomocu někajkeho nastroja abo instrumenta. Ale njemóžemy mjenowane tři słowjesa w serbšćinje přeco wuměnić, wone su na wěste konteksty wjazane. Třihać móžemy jenož z nožicami, třihamy tuž na přikład włosy, nochće, papjeru abo płat. Hdyž by něchtó prajił, zo na přikład kołbasu abo chlěb třiha, by drje to protest abo směch wuwołało, wšak za to njebjerjemy nožicy, ale nóž. Třihać móžeja so tež wowcy, tež tu wužiwaja so nožicy, chiba jich dźensniše moderne wotpowědniki-mašinki. Krać pak móžemy jenož žiwidła, móžemy pomazku wotkrać, tykanc nakrać, cyblu na drobne kuski rozkrać, a bjerjemy za to nóž.
Z rězanjom je to hinak, tute słowo ma znajmjeńša tři woznamy: Sprěnja móžemy z nožom rězać, mojedla hałžku wot štoma wotrězać. Zdruha móže rěznik skót rězać abo zarězać. A střeća móžemy z piłu rězać – zwjetša drjewo, ale druhdy tež druhe krućiše materialije. Někotři na přikład pječa skradźu na stólcu swojeho šefa rězaja. A štóž sej přeco hišće rady njewě z tym kraćom, třihanjom a rězanjom, tón njech pohlada do słownika – mojedla do Rězaka.
S. Wölkowa
temy: słowa podobne po woznamje abo formje
klučowe słowa: werb