Sadźamy abo tykamy běrny?
Štóž doma sam na swojej zahrodźe běrny abo neple plahuje, wě, zo je nětko najwjetši čas je do zemje přinjesć. Kak prajimy k tomu serbsce? Wězo sadźamy neple – bychu zawěsće hnydom mnozy z was, lubi připosłucharjo, wotmołwili. Haj, běrny abo neple sadźamy a hdyž smy z tym hotowi, prajimy, zo su wšitke běrny wosadźane. Štóž ma wulke běrnišćo a tohodla za sadźenje běrnow mašinu wužiwa, mjenuje ju snadź běrnysadźawu abo tež běrnysadźak. Štóž město běrnow neple jě, tón ma wězo doma stejo neplesadźawu abo neplesadźak. Werb sadźeć je w serbšćinje powšitkowny wotpowědnik, hdyž wužiwa so w němčinje werb „pflanzen“. Sym tež hižo słyšała a čitała, zo něchtó swoje běrny tyka, ale mi so zda, zo je tole nowše wuwiće. W digitalnym tekstowym korpusu hornjoserbšćiny namakamy wjazbu neple tykać abo běrny tykać jenož jara zrědka a hdyž, potom w nowšej literaturje. Tuž, lubi připosłucharjo, mějće so do spěcha ze sadźenjom neplow, zo byšće je bórze móhli žnjeć – abo tola zběrać? Ale to je tema za dalši rěčny kućik.
A. Pohončowa
temy: słowa podobne po woznamje abo formje
hesła: běrny, neple, sadźeć, tykać, pflanzen, Kartoffeln stecken