Knuspermüsli

K snědani jěm rady misli. Husto sej misli tež sama zestajam a změšam, ze wšelakich tružkow, worješkow a sušenkow. To wěm, što jěm a zo njeje poł punta cokora w mojim misliju. Wosebje rady jěm tak mjenowany „Knuspermüsli“. A tutón sej tež sama pjeku. Haj, wón so w pjecy pječe. Ale kak rěka nětko „Knuspermüsli“ serbsce? Na soblex.de namakamy chrymstaty abo krympaty misli. Za werb „knuspern“ mamy chrymstać, chrymsćić, krympotać abo chrympać. Sprawnje prajene, tute tróšku spodźiwnje klinčace słowo bě mi hač dotal dospołnje njeznate. W druhich słowjanskich rěčach pak mamy podobne słowa za tute knakotace a knyskotace jědźenje, na př. w pólšćinje chrupać abo w rušćinje хрумкать. Je to drje onomatopoetisce, to rěka, zo so ze słowom zwuk tutoho čina napodobnjuje. Jeli sedźiće nětko při snědani a runje misli chrymstaće, njech tak prawje knakoce. Dajće sej słodźeć!

L. Šołćic

temy: serbske wotpowědniki za němske słowa, słowa podobne po woznamje abo formje, regionalne rozdźěle w serbšćinje

klučowe słowa: werb

hesła: Knuspermüsli, knuspern, chrymstać, chrymsćić, krympotać, krympać, chrymstaty, krympaty