Biologija, geografija atd.

Princip stajneho wospjetowanja je jedna z didaktiskich zasadow za wuspěšne wuknjenje. Tuž so dźensa wospjet problemej wěnuju, kotryž sym hižo před wjacorymi lětami tematizowała. Dźeń a husćišo słyšimy abo čitamy w zwisku ze šulskej wučbu, zo je něchtó w *biologize abo w *geografize to abo tamne nawuknył. Wony fakt drje je zwjeselacy, ale rěčnje njekorektnje wopisany. Substantiwy žónskeho rodu tworja formy lokatiwa na -e, tak čitamy w knize, kupamy so we wodźe abo dźeržimy něšto w ruce. Tole pak nastupa jenož feminina z twjerdym zdónkom. Njeprajimy pak, zo něšto w *šize boli, abo zo něšto *w biblize steji, dokelž so žónske substantiwy z mjechkim zdónkom hinak deklinuja, potajkim nastupa tole wšě, kiž na -ija kónča. Tutym so při skłonjowanju kóncowka -i přida. A z tuteje přičiny so wjeselimy, zo šulerki a šulerjo w biologiji a w geografiji mnoho nawuknu, zo so w ekologiji wuznaja, w ortografiji mało zmylkow woraja a snano tež w bibliji čitaja.

J. Šołćina

Themen: Grammatik

Schlüsselwörter: Kasus, Deklination, Substantiv, Lokativ Singular

Wörter: -ija, biologija, geografija, biblija