Truhać

Jěm rady spaghetti, a znaju k tomu tójšto dobrych juškow. Husto bjerje so jako wudospołnjenje k tomu dobry italski parmezanski twarožk, štož rěka poprawom jenož ‚twarožk z Parmy‘. Wězo njebjeru jón cyły, ale drobny rozmlěty. Haj, sće prawje słyšeli, mam mjenujcy elektriski twarožkowy młynčk. Z tym móžeš twarožk bjezposrědnje na taler zmlěć a wón je cyle čerstwy. A što činja druzy, kiž tajki profi-grat nimaja? Njedawno sym słyšała, zo twarožk rybuja – to sym so dźiwała. Pola mnje rybuja abo šudruja črije, chiba tež přewuski kornar. Twarožk pak so truha, runje kaž móžemy morchej abo jabłuka roztruhać a z nich słódnu solotej přihotować, a bjerje so za to truhančko abo truhačk, kiž drje w žanej kuchni njefaluje. Wězo ma werb truhać hišće dalši woznam – mój muž čini to kóždy dźeń rano ze swojej brodu, ale truhančko abo truhačk so za to njehodźi, skerje truhanski aparat, tež truhadło mjenowany. Hdyž pak kazaće sej we wobchodźe grat za truhanje, prajće jasnje, što chceće truhać, brodu abo zežiwidła. Hewak was hišće něchtó truhnje – to rěka wobšudźi, a njetrjeba za to ani truhančka ani truhanskeho aparata.

S. Wölkowa

temy: serbske wotpowědniki za němske słowa, słowa podobne po woznamje abo formje

klučowe słowa: werb, wotwodźenka, požčonka, němčina

hesła: truhać, truhačk, truhančko, rasieren, rybować, reiben