Rěčne kućiki

Zwjeno

W poslednich lětach je so technika tež hladajo na kolesa spěšnje dale wuwiła: Multifunkcionalne wodźidło, klukowa abo kurblowa technologija kaž tež swěca, šaltowanje abo pjerowanje hodźa so mjeztym kompletnje z elektroniku regulować. Dale wuwili su so na přikład tež spinadła abo borzdźidła. Za čas našich dźědow a wowkow spinaše so hišće tak, zo tłóčeše gumijowy klock na wobruč. Pozdźišo stej gumijowej klockaj na zwjeno tłóčiłoj; tak bu zwjenowe spinadło wunamakane. Słowo zwjeno rěka němsce „Felge“ a je stare serbske słowo. Wone pochadźa ze starosłowjanšćiny a pomjenuje – kaž w druhich słowjanskich rěčach tež – něšto, štož je skulojćene. Zwjeno njeznajemy jenož pola kolesa, ale tež pola awta. Móžu potajkim prajić, zo ma tute awto rjane aluminijowe zwjena město alufelgi, štož je drje krótše, ale wobchadnorěčne. Naše awto znajmjeńša změje bórze zymske wobruče na zwjenach, wšako njeje zyma hižo daloko!

A. Pohončowa

temy: serbske wotpowědniki za němske słowa

klučowe słowa: substantiw, wobchadna rěč

hesła: zwjeno, Felge