Windhundverfahren

W času digitalizowanja organizujemy sej mnohe wěcy wšědneho dnja z pomocu interneta. Chcych so njedawno za wěsty kurs přizjewić, a přećelna žona mi při telefonje praješe, zo měła so na internetowej stronje zapisać a potom so „im Windhundverfahren“ rozsudźi, hač směm so wobdźělić. Wo tajkim principje tworjenja rozsudow hišće ničo słyšała njeběch. W serbšćinje znaju drje wobrot „ta wěc ma chorta“, ale byšće wy, lubi słucharjo, wědźeli, što je chortowski princip abo postupowanje po přikładźe dołhonohatych hońtwjerskich psow? Wězo spěšnje za tym přińdźeš, kotry zmysł so za němskej zestajenku „Windhundverfahren“ chowa: Tón, kiž je najspěšniši w procesu přizjewjenja, městno w kursu dóstanje. Wězo móhli serbsce prajić, zo rozsudźi so po principje spěšnosće resp. po principje priority. Namjetaj honjenski abo hońtwjerski princip njebych wužiwała. A tak bych serbsce situaciju skerje leksikalisce wopisowała a prajiła: Čim spěšnišo so w interneće přizjewju, ćim prawdźepodobnišo je, zo městno dóstanu.

J. Šołćina

temy: serbske wotpowědniki za němske słowa

klučowe słowa: substantiw, zestajenka, přenjeseny woznam

hesła: Windhundverfahren, princip spěšnosće, princip priority