Wasserbad

Tuchwilu so wšitcy za prózdninskim wočerstwjenjom žedźa a kupjele steja wysoko w kursu: kupamy so w jězorach, hatach a w morju, w lěsnych, přirodnych a zabawowych kupjelach – „Spaßbäder“. Ja pak chcu so dźensa kupjeli w kuchni wěnować, štož kusk paradoksnje klinči, tola dobrej kucharce a dobremu kucharjej derje znate je: Hdyž maja so zežiwidła za dalše předźěłanje cyle łahodnje zwohrěwać a so při tym božedla zawarić njesmědźa, wužiwaja woni za to tak mjenowany „Wasserbad“. Tak so na přikład šokolada za wšelake desserty w mjeńšim sudobju do wjetšeho hornca z warjacej wodu staji, zo by rozběžała a so při tym njepřismudźiła. A kak prajimy to serbsce? Myslu sej, zo móžemy so na spočatnje mjenowanych twórbach za specielne kupanske zarjadnišća orientować. A tuž namjetuju, zo bychmy tu rěčeli wo wódnej kupjeli abo wo horcej wódnej kupjeli. Z tym bychmy so přizamknyli susodnymaj słowjanskimaj rěčomaj: tak maja Češa „vodní lázeň“; a Polacy praja na to „kąpiel wodna“. Tajka we wódnej kupjeli rozeškrěta šokolada hodźi so připódla prajene tež za samočinjeny šokoladowy lód wužiwać – a tón nam w nětčišej horcoće zawěsće tež derje čini.

S. Wölkowa

temy: serbske wotpowědniki za němske słowa

klučowe słowa: substantiw

hesła: Wasserbad, wódna kupjel