Tretboot & Schlauchboot

W lěćnym času mnozy přemysluja, hdźe sej swójba wuleći – snano do Łužiskeje jězoriny, hdźež bychmy sej móhli čołm wupožčić a po jednym abo wjacorych jězorach čołmikować. Kak by było na přikład z tak mjenowanym tretbootom? Za němski „Tretboot“ móžemy tworić serbski wotpowědnik čołm k teptanju, snadź tež pedalowy čołm, wšak z pomocu pedalow čołm pohibujemy. Nimo tajkeho čołma k teptanju móžemy so tež do šlawchboota sydnyć a po jězorje wjesłować. Mjeno tajkeho čołma pokazuje na hłowny wobstatk, a to je hadźica, kotruž z powětrom naklumpamy. Tohodla mjenujemy – znajmjeńša w spisownej rěči – tajki čołm hadźicowy čołm. W słowniku je nimo toho zapisany wuraz gumijowy čołm. Hačrunjež njewobsteja dźensa wšitke hadźicowe čołmy z gumija, ale z druheje kumštneje maćizny, hodźi so gumijowy čołm – podobnje kaž w druhich rěčach – tohorunja jako powšitkowny serbski wotpowědnik. – Tuž, lubi připosłucharjo, přeju Wam wjele wjesela na wodźe, hdyž z čołmom po jězorje teptaće abo w hadźicowym resp. gumijowym čołmje wjesłujeće!

A. Pohončowa

Themen: Sorbische Entsprechungen für deutsche Wörter

Schlüsselwörter: Substantiv, Zusammensetzung

Wörter: Tretboot, Schlauchboot, čołm k teptanju, pedalowy čołm, hadźicowy čołm, gumijowy čołm