Rěčne kućiki

Trawusyčaki

Sezona w zahrodkach je so dawno započała a tež trawa rosće a rosće. Tuž słyšimy zaso zwučene brunčenje trawusyčakow ze wšěch róžkow. Mjeztym poskićuja we wobchodach wšě móžne a njemóžne warianty trawusyčakow. Najhusćišo wužiwaja so drje bencinowe a elektriske trawusyčaki. Wone syku trawu z pomocu wótreho serpa abo noža. Wosebity korbik, hdźež so syčena trawa hromadźi, je za zahrodnika wulka pomoc, dokelž zalutuje sej přidatne hrabanje. Eksistuja pak tež trawusyčaki za mjeńše płoniny bjez tajkeho korbika, kotrež so minimalnje do powětra zběhnu a so takrjec znošuja, němsce „Luftkissenmäher“, serbsce bych k tomu prajiła powětrozawkowy trawusyčak, ale poprawom je to lětacy trawusyčak, nic wěrno? Dokelž su poměrnje lochke, hodźa so wosebje za žony a staršich ludźi. Štóž ma na wjetšich płoninach trawu syc, tón wužiwa zawěsće trawusyčak z nóžnikom, němsce „Mähbalken“, snadź samo mały abo wjetši traktor z nóžnikom. Ćicha alternatiwa k mjenowanym družinam trawusyčakow móže być walcowy syčak (němsce „Spindelmäher“), kotryž dźěła ryzy mechanisce. Dalše techniske warianty a ekstrawagancy chcu wam na tutym městnje zalutować, zo njebychu so waše mozy parić započeli kaž trawa na hromadźe.

A. Pohončowa

temy: serbske wotpowědniki za němske słowa

klučowe słowa: substantiw

hesła: trawusyčak, Luftkissenmäher, Spindelmäher, Mähbalken, nóžnik