Suche dny

Njedawno storčich na zajimawy wuraz, mjenujcy suche dny. Měnjene běchu z tym wěste póstne dny a to stajnje srjedu, pjatk a sobotu w prěnim póstnym tydźenju po popjelnej srjedźe, w swjatkownym tydźenju, w třećim tydźenju septembra a w třećim adwentnym tydźenju; potajkim jónu w kóždym kwartalu lěta. Tohodla wužiwaše so za nje tež wuraz kwatemberske dny. Ale zwotkel přińdźe wuraz suche dny? Ma to něšto ze suchej jědźu činić, kiž smědźachu sej ludźo na tutych dnjach jenož popřeć, abo leži motiwacija pola wosebje sucheho wjedra na tutych dnjach. Faza prěnich suchich dnjow lěta leži dwaj do wosom dnjow do połneho měsačka. Statistiske přepytowanja w zašłosći su dopokazali, zo padachu w tutym času jara zrědka sylne spadki. Tuž je woprawdźe móžno, zo wuraz suche dny z wjedrom resp. z měsačkom zwisuje. Tež postajenje najwjetšeho cyrkwinskeho swjedźenja wotwisuje wot měsačka: jutry. Su mjenujcy přeco na prěnjej njedźeli po nalětnim połnym měsačku. Hač su tohodla wone mokriše po wjedrje, njemóžu pak z wěstosću prajić.

A. Pohončowa

Themen: Sorbische Entsprechungen für deutsche Wörter, Regionale Unterschiede im Sorbischen, Herkunft der Wörter

Schlüsselwörter: Wendung, Substantiv

Wörter: suche dny, kwatemberske dny, Quatemberfasten, póstne dny