Rěčne kućiki

Pječenske funkcije

Štóž rady pječe, so zawěsće tež z techniku swojeje pjecy wuznaje. Wěsty standard mjeztym je, zo móžu wolić mjez „Ober- und Unterhitze“ a „Umluft“. Serbske wotpowědniki za „Oberhitze“ a „Unterhitze“ namakamy hižo w dwuzwjazkowym němsko-hornjoserbskim słowniku, je to prosće hornja horcota abo horcota wothorjeka resp. spódnja horcota abo tež horcota wotspody. Ale kak je to ze słowom „Umluft“; pola někotrych pjecow rěka to tež „Heißluft“? Poprawom je to tež cyle jednorje, wšak njeje to ničo druhe hač pječenje z wentilaciju abo pječenje z horcym powětrom. Moderniše pjecy maja hišće dalše funkcije, na přikład grilowanje abo grilowanje z horcym powětrom, dale intensiwne pječenje, štož njeje ničo druhe hač wužiwanje horcoty wot spody. Pola funkcijow „Sanftgaren“ a „Bräunungsgaren“ dźe wo pječenje z niskej temperaturu. Druhe pjecy zaso dowoleja pječenje z paru resp. pječenje z parjenjom abo paropječenje (ně. „Dampfgaren“). Najćeše za wužiwarja drje je, prawu funkciju za pječenje wuzwolić. Tohodla poskićuja so mjeztym samo awtomatiske programy za konkretne jědźe. Kuchar abo kucharka trjeba jenož jědź přihotować, do pjecy sunyć a na prawy knefl tłóčić. A po wěstym času je wšitko hotowe! Tuž dajće sebi zesłodźeć!

A. Pohončowa

temy: serbske wotpowědniki za němske słowa

klučowe słowa: substantiw

hesła: pječenske funkcije, Heißluft, Oberhitze, Unterhitze, Dampfgaren, Umluft, hornja horcota, horcota wothorjeka, spódnja horcota, horcota wotspody, pječenje z wentilaciju, pječenje z horcym powětrom, Sanftgaren, Bräunungsgaren, pječenje z niskej temperaturu, pječenje z paru