Offenlegen

W zwisku z financami a kontami so husto wužiwa němske słowjeso „offenlegen“, štož mějićel konta abo wobsedźer pjenjez drje čini, zwjetša pak nic dobrowólnje. Kak pak serbsce k tomu prajimy? Dwuzwjazkowy němsko-hornjoserbski słownik nam w tutym padźe dale njepomha, dokelž so słowo „offenlegen“ tam njejewi.

Pytajmy tuž za rozrisanjom: Cyle neutralnje móhli rjec, zo něchtó wšě swoje konta – na přikład financnemu zarjadej – pokaza a tež sprawnje praji, kajke je jeho financielne połoženje. W Starym zakonju pak namakach starši wuraz, kotryž bych w tutym zwisku reaktiwizowała. Měnju słowjeso wozjawnić. Wone je w někotrych serbsko-němskich słownikach zapisane jako ekwiwalent za němske „öffentlich machen“ kaž tež w terminologiskej zběrce za nabožinu w zmysle „etwas offenbaren“. Tole drje našemu kontekstej wotpowěduje. A tak móhli prajić, zo něchtó swoje konta resp. swoje financy wozjawni.

J. Šołćina

temy: serbske wotpowědniki za němske słowa

klučowe słowa: werb

hesła: offenlegen, öffentlich machen, wozjawnić