Klimakleber

Hižo někotre měsacy dołho wobkedźbujemy – takrjec zdaloka – wšelake akcije přiwisnikow tak mjenowaneje skupiny Poslednja generacija. K najwoblubowanišej metodźe je so mjeztym blokěrowanje dróhow wuwiło. Za to so młodźi ludźo na pućach přilěpjeja, zo bychu zrumowanje blokadow poćežowali. Tutych akcijow dla mjenuja jich mnozy „Klimakleber“ – štož je husto dosć wothódnoćace měnjene. W serbskich tekstach wužiwaja dotal zwjetša za pomjenowanje wonych akterow wuraz klimowi aktiwisća po ně. wurazu Klimaaktivisten. Ale wězo móžemy tež w serbšćinje wužiwać motiw lěpjenja za pomjenowanje wosoby, mjenujcy klimowy lěpjer. Ći, kotřiž so potajkim na pućach přilěpjeja, su klimowi lěpjerjo. Chcu-li pak podobnje kaž w němčinje swoje wothódnoćenje tajkich lěpjenskich akcijow w słowje samym wuzběhnyć, móžu tworić substantiw lěpjak. Pluralowa forma w spisownej rěči by potom rěkała klimowi lěpjacy resp. lěpjakojo, we wobchadnej rěči pak klimowe lěpjaki resp. samo klimalěpjaki. – Tak njeje trjeba w serbšćinje rěčeć wo klimakleberach, ale wo klimowych lěpjerjach abo klimowych lěpjakach.

A. Pohončowa

Themen: Sorbische Entsprechungen für deutsche Wörter, Wortbildung

Schlüsselwörter: Substantiv, Zusammensetzung, komplexe Benennung, Wortbildung, Schriftsprache, Umgangssprache, Stil, Lehnwort, Deutsch

Wörter: Klimakleber, klimowy lěpjer, klimalěpjak, Klimaaktivist, klimowy aktiwist