Herzschrittmacher und Schrittzähler

Zasadźenje moderneje techniki we wobłuku mediciny je w zašłych lětdźesatkach pomhało žiwjenje tójšto čłowjekow wuchować abo polěpšić. K trochu staršim aparaćikam słuša tak mjenowany „Herzschrittmacher“. W němsko-hornjoserbskim słowniku namakamy za to dwaj serbskej wotpowědnikaj: pohonjak wutroby a wutrobowy kročelak. Prěni wuraz (pohonjak wutroby) zwuraznja činitosć, kotruž tutón nastroj wukonja: Wón pohonja respektiwnje pohonjuje z pomocu elektriskich impulsow wutrobowy muskl, zo by so dale rytmisce pohibował. Potajkim hodźi so nimo wuraza pohonjak tež pohonjowak, wšak je to stajnje so wospjetowaca činitosć. Po přikładźe delnjoserbšćiny hodźi so tež prajić stimulator wutroby respektiwnje stimulator za wutrobu respektiwnje w fachowej rěči kardiostimulator (po čěšćinje). Druhi w słowniku podaty serbski wotpowědnik kročelak bych radšo za dalšu technisku nowostku wužiwała, mjenujcy za němske „Schrittzähler“. Kročelak je nastroj, kotryž kročele liči. Móžu sej jón rano do zaka tyknyć a wječor mi přeradźi, kelko kročelow sym činiła a tole přeliči na metry abo samo kilometry. Tajki kročelak wužiwa so wosebje při sportowanju abo pućowanju, w přiběracej měrje pak tež w strowotnistwje, zo bychu ludźo lěpje kontrolować móhli, hač so dosć pohibuja.

A. Pohončowa

Themen: Sorbische Entsprechungen für deutsche Wörter

Schlüsselwörter: Substantiv, Ableitung, Internationalismus

Wörter: Herzschrittmacher, Schrittzähler, kročelak, pohonjowak (wutroby), pohonjak (wutroby)