Figlantny

Štó je figlantny? Zaso tajke we wšědnej domjacej serbšćinje dosć derje znate słowo, a naše słowniki wo nim mjelča. Křesćan Krawc pak pisa: „Tež hdyž chcemy, zo by to serbske wostało, dyrbimy być figlantniši. Hospodarsce sylni dyrbimy być, hewak nas rjaneho dnja připlacnu druhdźe …“ Figlantny – druhdy słyšiš tež njedeklinabelnu wariantu figlant – je něchtó, kiž je wobrotniwy, překlepany, kiž wě sej w kóždej situaciji pomhać. A zwotkel so tute słowo bjerje? Zakład je tónkróć łaćonšćina, hdźež mamy słowo „vigilans“ z woznamom ,stražliwy, kedźbliwy‘ – tele słowo je sej němčina přiswojiła w formje „vigilant“ a je woznam rozšěriła na tajki, kaž jón tež w serbšćinje znajemy, potajkim ,wobrotniwy‘ abo ,překlepany‘. Wo tym, zo je słowo daloko po cyłej Němskej rozšěrjene, swědči fakt, zo eksistuja wšelakore narěčne warianty – tak praja na přikład w Lipsku za to „fischelant“, tež moja přichodna mać z Rudnych horin słowo w tutej formje znaje. Njech je kaž chce, lubi připosłucharjo – přeju wam, zo wužadanja dźensnišeho dnja z trěbnej figlantnosću zmištrujeće.

S. Wölkowa

Themen: Herkunft der Wörter

Schlüsselwörter: Adjektiv, Lehnwort, Latein

Wörter: figlantny, figlant, překlepany, wobrotniwy