Betreutes Wohnen

Formy zhromadneho bydlenja su dźensa wšelakore, štož so tež w modernym słowoskładźe wotbłyšćuje. Młodostni, mjez nimi studenća, bydla hustodosć we wjetšich městach w bydlenskich zhromadźenstwach, za kotrež je so němska skrótšenka „WG“ etablěrowała, kotraž drje so takle tež w serbšćinje wužiwa. Ličba domjacnosćow, w kotrychž něchtó sam bydli, je po informacijach statiskeho zarjada Němskeje ze sydomnaće milionami najwyša. Tute so w němčinje z pomocu hybridneje zestajenki „Singlehaushalt“ wopisuja – serbsce móžemy na to rjec singlowa domjacnosć, wobchadnorěčnje skerje single-domjacnosć, a bjez wužiwanja anglicizma jednowosobowa domjacnosć. Za dalšu formu bydlenja, praktikowanu zwjetša wot staršich wobydlerjow, wužiwa so němske pomjenowanje „betreutes Wohnen“. Tu móžemy w serbskich přełožkach diferencować: W bydlenju ze zastaranjom bydla tajcy, kotřiž su hišće poměrnje agilni, ale kotrymž so pomha na přikład při rjedźenju abo kotrymž so prawidłownje jědź dowožuje. Bydlenje z hladanjom pomjenuje formu, hdźež so hladanja potrěbni tež medicinisce zastaruja. Sym dźakowna za to, zo njejstej mojej staršej we wysokej starobje hladanja potrěbnaj a so samaj zastarujetaj, štož je w dźensnišim času zawěrno wulke zbožo!

J. Šołćina

Themen: Sorbische Entsprechungen für deutsche Wörter

Schlüsselwörter: hybride Zusammensetzung, Anglizismus, Terminologie

Wörter: betreutes Wohnen, WG, Singlehaushalt, jednowosobowa domjacnosć, singlowa domjacnosć, single-domjacnosć, bydlenske zhromadźenstwo, bydlenje ze zastaranjom, bydlenje z hladanjom