Rěčne kućiki

Linksruck vs. Rechtsruck

Dźensa přiwobroćimy so temje z wobłuka politiki. W zwisku z poslednimi wólbami do krajneho sejma dyrbjachmy w zwisku z wuslědkami konstatować zjaw, kotryž so w němskich medijach pomjenuje ze słowom „Rechtsruck“. Runje tak so wužiwa za wopisowanje tendency do nawopačneho směra „Linksruck“. Kak wobaj zjawaj nětko serbsce pomjenujemy?

Słownik nam w padźe „Ruck“ dale njepomha, wšako so tam jenož słowo stork jewi. Lěpši namjet so namaka pod hesłom „ruckartig“, hdźež steji mjez druhim njejapki wobrot. Tuž namjetuju za wopisowanje zjawa přesunjenja mocy pak nalěwo pak naprawo: wobrot nalěwo respektiwnje wobrot naprawo abo tendenca naprawo respektiwnje tendenca nalěwo. Jedna-li so wo konkretny wuslědk wólbow, potom namjetuju leksikaliske wopisowanje kaž přiběranje prawicarskich respektiwnje přiběranje lěwicarskich hłosow, abo tež zesylnjenje prawicarskeho respektiwnje zesylnjenje lěwicarskeho wliwa. Dalše móžne pomjenowanje je tohorunja přesunjenje nalěwo abo přesunjenje naprawo. Kaž prajene, nochcu hódnoćić, dźe tule jeničce wo pomjenowanje woneho zjawa.

J. Šołćina

temy: serbske wotpowědniki za němske słowa

klučowe słowa: substantiw, přenjeseny woznam, wotwodźenka

hesła: Linksruck, Rechtsruck, lěwicarski, prawicarski