Trjechnosć

Njedawno sym čitała sadu: „Trjechnosć Patrika Woka ze Šunowa je dale konstantna.“ Što drje je trjechnosć? Z přisłušneho teksta zhoniš, zo dźe wo kopańcu, a tón młodźenc z tej konstantnej trjechnosću je w jednej hrě 10 króć do wrotow trjechił. Swita mi, zo je tomule słowu zaso jónu němčina kmótřiła. Dźe wo „Treffsicherheit“ a pod tutym hesłom trjechnosć samo w słowniku steji. Sada je přikład za tak mjenowany nominalny stil, kiž wšak je w žurnalistice legitimny a husto wužiwany. Měnju pak, zo móhło žiwosći wuraza w mjenowanej sadźe jara spomóžne być, hdyž spytamy jónu wobeńć abstraktny substantiw, a sadu kreatiwnje přeformulujemy z pomocu słowjesa: „Patrik Woko dale wuspěšnje wrota třěla.“ A z 10 wrotami w jeničkej hrě je wón zawěrno wuspěšny třělc wrotow, haj poprawom hotowy kral wrotowych třělcow. – Ale poprawom wšak so ja za kopańcu njezajimuju.

S. Wölkowa

temy: serbske wotpowědniki za němske słowa

klučowe słowa: substantiw, kalka, wotwodźenka, němčina

hesła: trjechnosć, Treffsicherheit, třělc