Super

Njedawno sym wam, lubi připosłucharjo, něšto wo rozdźělnym wašnju zwuraznjenja młódšich a staršich powědała złožujo so na přikłady ze słowčkom cool. Dźensa pak rěču wo słowčku super. Tež w serbskej literaturje je so wone hižo etablěrowało, samo Jurij Brězan je wužiwa. Najwjace přikładow pak nadeńdźemy w knize „Matej w štwórtej dimensiji“. Tam so pisa, zo bě to „jedyn super action-film“ a „to bě jedna super cool show“. Haj, a tak so tež rěči: Tójšto wěcow je super, abo kaž njedawno wot pěstowarki słyšach supi. Wone super so potajkim jewi za wopisowanje něčeho, štož je wusahowace, jara rjane – my starši bychmy prajili přewšo rjane abo njesměrnje rjane. Bě to njesměrnje rjany koncert – abo bě koncert super? Bě to přewšo krasny swjedźeń – abo bě tón swjedźeń, pardon, ta party super? Haj, takle so rěč dale wuwiwa. Njeje tole super, abo tola radšo praju přewšo rjenje?

J. Šołćina

Themen: Sorbische Entsprechungen für deutsche Wörter

Schlüsselwörter: Adjektiv, Lehnwort, Deutsch, Nichtdeklinierbarkeit

Wörter: super