Nachrüsten

Praji so, zo je to kajkosć mužow, zo swoje awta nastajnosći rjedźa a tež přeco po najmodernišej technice wuhotuja. Njewěm drje, hač tole trjechi, ale přiwobroću so rěčewědnemu problemej, kotryž z awtami zwisuje. Do awtow, kotrež njejsu moderne typy, móžeš tež pozdźišo hišće wěste dźěle abo připrawy zatwarić, němsce so tomu praji „etwas nachrüsten“. Serbsce bych rjekła, zo so awto dodatnje wuhotuje, na přikład z klimowej připrawu resp. z klimatizaciju. Aktualne je tež žadanje za dodatnym wuhotowanjom awta z filtrom, kiž njeda tež najmjeńšim partiklam do powětra. Wězo móžemy tež cyle jednorje prajić, zo so něšto do awta zatwari, něšto při- abo přetwari. Tole móžemy tež z kompjuterom, tež wón hodźi so dodatnje hišće wuhotować. Lěpšina dodatneho wuhotowanja je ta, zo je wone tuńše hač kup noweho awta, kompjutera abo druheje twory!

J. Šołćina

temy: serbske wotpowědniki za němske słowa

klučowe słowa: werb

hesła: nachrüsten