Selfie

Čas dowola je nimo, w kotrymž sće zawěsće tež wy, lubi słucharjo, wjele fotografowali. Z modernymi šmóratkami móža so poměrnje lochko fota w dobrej kwaliće zawěsćić a dale wobdźěłać. Mnozy pak nochcedźa jenož krajinu abo města fotografować, ale tež wosobinske dopomnjenki we formje selfiejow před rjanymi kulisami přećelam a swójbnym sposrědkować. Požčonka selfie je so w zašłych lětach w hornjoserbšćinje etablěrowała a je tež w soblexu zapisana. Móhli wužiwanje cuzeje leksiki z tym wobeńć, zo na přikład prajimy, zo smy mnoho wobrazow resp. fotow wo sebi činili. Wosebje młódši Serbja pak anglicizm selfie wužiwaja, dokelž je komunikatiwny. Njedawno powědaše kolega, zo na př. we francoskim dźělu Kanady požčonki z jendźelšćiny wotpokazuja, a město słowa selfie radšo z francošćiny pochadźace pomjenowanje ego-portret wužiwaja, štož je wězo dwuzmyslne. Tuž móžeće raz přemyslować, hač dźensa selfie, wobraz wo sebi resp. foto wo sebi abo tež ego-portret z dalšimi wužiwarjemi interneta dźěliće – abo tež nic!

J. Šołćina

Themen: Sorbische Entsprechungen für deutsche Wörter

Schlüsselwörter: Anglizismus, Lehnwort, Substantiv

Wörter: selfie, wobraz wo sebi, foto wo sebi, ego-portret, Selfie