Z awtom jězdźić

„Jan jězdźi awto marki VW Polo.“ Takle abo podobnje drje so druhdy praji abo samo pisa, ale je to korektna sada? Štož nastupa konkretnu awtowu značku, wšak to za wšitkich Janow posudźować njemóžu, tola napadnje mi hnydom za serbšćinu njewšědne wužiwanje werba jězdźić ze substantiwom w akuzatiwje: awto jězdźić abo VW Polo jězdźić. Tajka konstrukcija wotpowěduje dokładnje němskemu „ein Auto fahren“ abo „einen VW Polo fahren“, štož je tam pódla „mit dem Auto fahren“ dospołnje normalny wuraz. Ale w serbšćinje to takle njeńdźe. Awto je nastroj k jězdźenju, a jako tajki pokaza so wón w serbskej sadźe z prepoziciju z a w instrumentalu, potajkim w 5. padźe. Jězdźimy z mercedesom, z trabantom, z traktorom abo tež z kolesom, kaž tak rjenje w serbskim šlagru rěka. A štóž chodźi do jězbneje šule, tón njenawuknje tam awto jězdźić, ale wězo z awtom jězdźić.

S. Wölkowa

temy: słowa podobne po woznamje abo formje

klučowe słowa: rekcija, prepozicija

hesła: jězdźić, awto, fahren, ein Auto fahren