Rěčne kućiki

Walčkowanje

Husto hižo słyšach namołwu, tak zaso na 12. hłownej zhromadźiznje Domowiny, zo měli Serbja skónčnje „walčkować wšitke swoje mocy“. W słownikach stej słowje walčk a walčkować zapisanej, na přikład w Kralowym słowniku so přełožuje walčkować z „in Bündel binden“. Do walčkow wjazać móžemy słomu, drjewo abo tež hałuzy, potajkim jednotliwe podołhojte předmjety. Namakach tež w tekstowym korpusu tójšto přikładow, słowne skupiny kaž walčkowane syno abo walčkowana słoma.

Konstrukcije ze słowom walčkować w přenjesenym zmysle mam za dźiwne. Tohodla bych w tajkich padach rěčała wo zjednoćenju mocow abo wo koncentrowanju mocow, nic pak wo walčkowanju mocow. Tež w kontekstach z předmjeta fyziki njetrjebatej so słowje walčk abo walčkować, tak so na přikład přełožuje „die Bündelung von Strahlen“ jako hromadźenje pruhow respektiwnje hromadźenje promjenjow.

Nó haj, štož namołwu na adresu Serbow nastupa, tu wězo přihłosuju – wšojedne, hač naše mocy koncentrujemy abo zjednoćimy abo hromadźimy.

J. Šołćina

temy: serbske wotpowědniki za němske słowa, słowa podobne po woznamje abo formje

klučowe słowa: werb, přenjeseny woznam

hesła: bündeln, walčkować, hromadźić, zjednoćić